នារសៀលថ្ងៃទី៩ ខែមេសា ឆ្នាំ២០២២ គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃព្រឹទ្ធសភា (គណៈកម្មការទី២) ដឹកនាំដោយឯកឧត្តម ជា ជេដ្ឋ ប្រធានគណៈកម្មការ ដោយមានការចូលរួមពីឯកឧត្តមឧកញ៉ា ម៉ុង ប្ញទ្ធី ប្រធានគណៈកម្មការទី៣ព្រឹទ្ធសភា បានអញ្ជើញជួបសំណេះសំណាលជាមួយក្រុមប្រឹក្សាឃុំកែវផុស នៃស្រុកស្ទឹងហាវ ខេត្តព្រះសីហនុ និងថ្នាក់ដឹកនាំក្រុមហ៊ុន ម៉ុង ប្ញទ្ធី គ្រុប ដើម្បីឈ្វេងយល់ប្រមូលព័ត៌មានស្តីពី «ការអភិវឌ្ឍឃុំកែវផុសរយៈពេល៥ឆ្នាំ និងទស្សនកិច្ចតំបន់អភិវឌ្ឍន៍កសិ-ឧស្សាហកម្ម ឧកញ៉ា ម៉ុង ឫទ្ធី» នៅសាលប្រជុំភូមិគ្រឹះ ឧកញ៉ា ម៉ុង ប្ញទ្ធី សរុបចំនួន ៣៦នាក់។ ជំនួបនេះ ក្នុងគោលបំណងឈ្វេងយល់កាន់តែស៊ីជម្រៅបន្ថែមទៀតលើ៖ ១-លទ្ធផលនៃការអភិវឌ្ឍមូលដ្ឋានឃុំកែវផុសរយៈពេល៥ឆ្នាំ។ ២-ការអនុវត្តថវិកាថ្នាក់ក្រោមជាតិ (ទទួល-ទូទាត់) ការធ្វើគម្រោងអភិវឌ្ឍមូលដ្ឋានការប្រើប្រាស់មូលនិធិសង្កាត់ (រជ្ជទេយ្យបុរេប្រទាន) និងបញ្ហាប្រឈម។ ៣-សមត្ថភាពក្នុងការកសាង និងអនុវត្តគម្រោងអភិវឌ្ឍថ្នាក់ឃុំ។ ៤-ការអនុវត្តគោលនយោបាយភូមិ ឃុំមានសុវត្ថិភាព និងការផ្តល់សេវាសាធារណៈ ។ ៥-ការចូលរួមអភិវឌ្ឍន៍មូលដ្ឋានរបស់វិស័យឯកជន និងអង្គការមិនមែនរដ្ឋាភិបាល។ ៦-វឌ្ឍនភាពនៃការអភិវឌ្ឍតំបន់អភិវឌ្ឍន៍កសិឧស្សាហកម្ម ឧកញ៉ា ម៉ុង ឫទ្ធី ៕
ប្រភព៖នាយកដ្ឋានព័ត៌មាន
